Është zbardhur dëshmia në gjyq e ish-ministrit të Drejtësisë, Ilir Beqaj në lidhje me koncesionin e Sterilizimit, ku akuzohet për shpërdorim detyre.
Ai ka shprehur pakënaqësitë se përse i referohen kësaj çështje “Ilir Beqaj dhe të tjerët” ndërsa shton se ai është i fundit në kërkesën e gjykatës. Ish-ministri i Drejtësisë, i cili ndodhet në burg për abuzimet me fondet e BE në kohën kur drejtonte “SASPAC” thotë se është i pafajshëm.
Ndër të tjera Beqajt thotë se nuk është informuar në mënyrë të duhur për avokatin e caktuar kryesisht, pasi ky i fundit nuk e ka takuar ndonjëherë.
“Sa i takon komunikimit publik, kjo nuk është çështja e Sterilizimit, as kontratë e Sterilizimit dhe as koncesion i Sterilizimit. Kjo nuk përmendet as në titullin e kontratës. Sterilizimi është vetëm një nga 6 komponentët e kontratës. Kjo është çështje e instrumenteve kirurgjikale.
E dyta, i referohen dosjes “Ilir Beqaj dhe të tjerët”. Unë jam i fundit në kërkesën e gjykatës. Pse duhet të thuhet “Ilir Beqaj dhe të tjerët”. Këta të tjerët i bie sikur janë këtu prej meje. Unë synoj pafajësinë dhe kjo është nominale.
Së treti, e kam për avokatin Maks Haxhia, si drejtues të Dhomës së Avokatisë. Avokati kryesisht i caktuar nga gjykata për dy javë tha se është i gatshëm për mbrojtjen, pa e lexuar dhe pa më takuar mua ndonjëherë.
Unë i kam parë edhe komentet e Maks Haxhiajt për SPAK-un.
Do të doja të informohem nga gjykata, kur ka ardhur avokati kryesisht të njihet me dosjen time?
Vendimi i datës 23.1.25 përmban të dhëna dhe informacione të rreme. Procedimi ndaj meje nuk duhet të kishte nisur, pasi i njëjti fakt penal është hetuar nga Prokuroria e Tiranës dhe ajo prokurori e ka pushuar çështjen.
Në vendimin e gjyqtares paraprake përmendet 15 herë neni i kodit penal, që flet për armëmbajtjen pa leje. Se ç’lidhje kam unë me këtë, nuk e di”- është shprehur në gjyq ai.
