Joe Jonas ka pranuar se ishte "i frikësuar dhe i pasigurt" për t’u rikthyer në botën e takimeve pas divorcit me Sophie Turner.
Gjatë një transmetimi në TalkShopLive, këngëtari tregoi se procesi i të rikthyerit në dashuri ishte i vështirë për të dhe se kjo përvojë e frymëzoi për të krijuar këngën e tij të re “Only Love”.
“Po takoja dikë në atë kohë dhe isha në fazën e rifillimit të takimeve. Ishte vërtet frikësuese,” tha Jonas. Ai shtoi: “Dashuria merr forma dhe kuptime të ndryshme, dhe unë po e zbuloja sërish se çfarë ishte ajo për mua.”
Personi që po takonte në atë kohë i kishte thënë: “Është vetëm dashuri,” gjë që e ndihmoi Jonas-in ta shohë situatën më lehtë. “E pamë që të dy si një hap besimi për të provuar sërish,” u shpreh ai.
Kënga “Only Love” do të jetë pjesë e albumit të tij të ri “Music for People Who Believe in Love”, që publikohet të premten.
Joe dhe Sophie përfunduan zyrtarisht divorcin në shtator të vitit 2024, pas një beteje të vështirë ligjore për kujdestarinë e dy vajzave të tyre, Willa (4 vjeç) dhe Delphine (2 vjeç). Turner kishte paditur Jonas-in për mbajtjen e pasaportave të vajzave dhe për pamundësinë për t’u kthyer në Angli, por më vonë ajo e tërhoqi padinë pasi arritën një marrëveshje për bashkëprindërim.
Pas ndarjes, Jonas ka qenë në qendër të vëmendjes për disa lidhje, përfshirë modelen Stormi Bree dhe aktoren Laila Abdallah. Ai është parë gjithashtu me një grua misterioze në Paris.
