Kryeministri Edi Rama pritet të mbledh në një takim këtë fundjave ministrat e kabinetit qeveritar. Mediat bëjnë me dije se mbledhja është parashikuar të mbahet ditën e premte në qytetin e Gjirokastrës.
Ky takim mes kryeministrit dhe ministrave të tij vjen dy javë pas zgjedhjeve të 11 Majit, ku PS fitoi 83 mandate.
Ndërkohë një ditë më parë, Rama mblodhi në Pallatin e Brigadave, kandidatët fitues dhe humbës të zgjedhjeve të 11 majit. Gjatë fjalës së tij, Rama paralajmëroi lëvizje nga radhët e Partisë Socialiste dhe në organin e qeverisë.
“Kemi garantuar drejtësinë, forcuar sigurinë, rritur reputacionin dhe kemi bërë histori me vendin tonë brenda kësaj dekade. Kemi mësuar se për t’i arritur këto suksese, duhet një punë e madhe me veten. Duhet ta nisim nga vetja për të ndarë mendjen si duhet mbi disa gjëra që duhen parë ndryshe, dhe duhet të bëjmë disa gjëra ndryshe. Duhet që të bëjmë disa lëvizje në udhëheqjen e partisë dhe në qeveri. Na duhet një mirëkuptim i plotë mes nesh dhe me familjen tonë europiane, sepse do ta përdorim fuqinë e mandatit të katërt’, theksoi Rama.
