Një ish-asistente personale e muzikantit Sean “Diddy” Combs ka dhënë një dëshmi në gjykatën federale të enjten, më 29 maj, duke deklaruar se është sulmuar seksualisht nga Combs dhe ka punuar në një ambient që e përshkroi si “toksik, të dhunshëm dhe traumatizues”.
Gruaja, e identifikuar si "Mia", u paraqit si "Viktima-4" në aktakuzën me pesë pika ndaj Combs, e cila përfshin akuza për trafikim seksual, rrëmbim dhe rekrutim për prostitucion. Combs ka mohuar të gjitha akuzat dhe ka deklaruar pafajësinë e tij.
Mia tha se ka punuar për Diddy nga viti 2009 deri në 2017, dhe roli i saj nuk kufizohej vetëm në detyra administrative. Sipas dëshmisë së saj, ajo duhej të “lexonte gjendjen e tij emocionale çdo ditë”, pasi ndikonte në gjithçka që ndodhte në ambientin e punës.
Ajo gjithashtu tha se, ndonëse kishte banesën e saj, rrallë flinte aty. Gjatë periudhës së punës, jetonte pjesërisht në shtëpinë e Combs dhe nuk i lejohej të mbyllte derën me çelës apo të dilte nga shtëpia pa leje.
Në një rast, ajo tha se kishte dalë me shoqërinë pas orës 2 të mëngjesit kur Diddy kishte fjetur, por menjëherë kishte marrë mesazh nga sigurimi i tij se po vinin ta merrnin.
Mia tregoi gjithashtu se kishte punuar deri në 5 ditë pa gjumë, gjë që e kishte çuar në gjendje të rënduar fizike dhe mendore. Ajo duhej të qëndronte pranë Diddy-t 20 orë në ditë, edhe kur ai nuk kërkonte asgjë prej saj.
“Isha gjithmonë në gatishmëri. Edhe kur nuk flisnim, duhej të qëndroja pranë tij,” – dëshmoi ajo.
Gjatë intervistës për punë me Combs, Mia tha se ishte dërguar në apartamentin e tij dhe ai e kishte pritur në të brendshme, para se të vishej më vonë. Ajo kishte punuar më parë për stilisten Georgina Chapman (ish-bashkëshortja e Harvey Weinstein) dhe aktorin Mike Myers.
Dëshmia e Mia-s vjen pasi disa gra dhe bashkëpunëtorë të mëparshëm kanë dëshmuar kundër Diddy në një seri padish civile dhe tani në procesin penal që po zhvillohet në SHBA. Ai përballet me akuza serioze që përfshijnë trafikim seksual, rrëmbim dhe shfrytëzim për prostitucion.
Mia përfundoi dëshminë e saj duke lënë gjykatën në heshtje, ndërsa prokurorët pritet të thërrasin më shumë dëshmitarë në ditët në vijim.
