Kreu i Partisë Demokratike, Sali Berisha në një deklaratë për mediat tha se brenda datës 15 Qershor do të bëjnë publik raportin sa i takon zgjedhjeve të 11 Majit.
Ky raport, që sipas Berishës do nxjerrë në pah “farsën elektorale” të zhvilluar nga Partia Socialiste, do të drejtohet tek të gjitha kancelaritë e vëndeve anëtare të OSBE-së, BE-së, si dhe Këshillit të Evropës.
Berisha paralajmëroi se nuk do të ndalet së denoncuari këtë që ai e cilëson si një proces tërësisht të manipuluar, me qëllim ndërgjegjësimin e çdo qytetari për realitetin e vërtetë të 11 Majit.
“Raporti përfundimtar do bëjmë çdo gjë që të jetë gati nga data 10 qershor, por ndërkohë, ne si dokumente i nisim që të gjitha në misionin e ODIHR dhe misione të tjera vëzhguese. Ku do shkojë raporti përfundimtar? Raporti përfundimtar do shkojë në të gjitha kancelaritë e vendeve anëtare të OSBE-së, BE-së dhe Këshillit të Europës. Raporti përfundimtar do të shkojë në të gjitha institucionet ndërkombëtare, konventat e të cilave janë dhunuar në këto zgjedhje. Raporti përfundimtar do të shkojë në të gjitha parlamentet e vendeve anëtare të OSBE, BE dhe KiE. Pra, këto janë destinacionet e raportit përfundimtar, por për të mbajtur nonstop të informuar, ne kemi operuar me raportin paraprak, tani kemi përgatitur raportin e ndërmjetëm dhe raportin përfundimtar do përpiqemi ta përgatisim midis datës 10 dhe 15 qershor me çdo kusht”, tha Berisha.
