Detaje të reja janë zbardhur lidhur me ngjarjen e ndodhur mbrëmjen e djeshme në Durrës, në zonën e Fllakës, pranë kufirit me Shënavlashin, ku një 36-vjeçar është qëlluar me armë zjarri.
I plagosuri, Arbër Goreja, ka sqaruar se kishte qenë duke udhëtuar kur një makinë tip “Ford” e bardhë e cila e ka ndjekur dhe ka ndaluar paralelisht me mjetin e tij. Pasi ka ndaluar, automjeti ka hapur zjarr, duke e qëlluar me armë në trup. Sipas deklaratës së tij, ai ka marrë tre plumba, ndërsa njëri e ka kapur në brinjë.
Arbër Goreja ka theksuar se nuk i njeh autorët e sulmit dhe ka siguruar se nuk ka pasur asnjë konflikt me persona të tjerë. Ai ka shtuar se mendon se mund të jetë ngatërruar me dikë tjetër.
“Isha duke ardhur në Durrës dhe mu afrua një makinë Ford e bardhë me portobagazh. Ndërkohë që po ecja, më erdhi paralel automjeti dhe më qëlloi tri herë me pistoletë. Mua më kapi një plumb në brinjë. Në fillim nuk po kuptoja nga shoku dhe më pas më nisi dhimbja. Makina më ndoqi disa metra dhe më pas ndaloi. Nuk i njoh autorët. Unë nuk kam konflikte të kaluara me persona të tjerë. Ndoshta më kanë ngatërruar me ndonjë person tjetër”, tha Arbër Goreja.
Policia ka nisur hetimet për zbardhjen e plotë të ngjarjes dhe identifikimin e autorëve të mundshëm.
