Në maj të vitit 2023, Napoli sapo kishte fituar titullin e tretë kampion në historinë e tij dhe duhet të merrte në konsideratë vendimin e Luciano Spalletti për të bërë një pauzë (për të shkuar më pas të drejtonte Kombëtaren tre muaj më vonë). Aurelio De Laurentiis u angazhua në kërkimin të trajnerit të ri dhe kontaktoi edhe Luis Enrique, por pa arritur në një marrëveshje. Zgjedhja ra më pas mbi Rudi Garcian, me pasojat katastrofike që e pasuan, por në tetor vetë De Laurentiis mburrej me faktin që nuk u arrit marrëveshja me trajnerin spanjoll, duke e shprehur me kënaqësi në dritën e rezultateve të dobëta që po kishte asturiani në atë kohë te PSG: “E patë?”
Gati dy vite më vonë, Luis Enrique është trajneri më i mirë në qarkullim, sapo ka fituar tripletën me skuadrën parisiene, e vulosur me fitoren e Champions League ndaj Inter. Nga ana tjetër, nuk ka shkuar keq as për Napolin, pas vitit të tmerrshëm me vendin e dhjetë (dhe me stafetën e Mazzarri dhe Calzona në stol pas shkarkimit të Garcias), pasi zgjedhja pasuese për Antonio Conte solli titullin e katërt kampion që në sezonin e parë të trajnerit nga Lecce.
Pse Luis Enrique nuk shkoi te Napoli: versioni i De Laurentiis
Në atë maj të dy viteve më parë, De Laurentiis kishte folur disa herë me Luis Enrique, i cili në atë moment ishte i lirë pas dështimit në Kupën e Botës në Katar me Spanjën, por ideja u la shpejt mënjanë: “Është një trajner i madh – kishte thënë në ato ditë presidenti i Napolit – bëri shumë mirë te Barcelona, por besoj se ka në mendje Premier League. Duhet të kujtojmë që konkurojmë me kampionate që janë më tërheqëse se i yni, si ai anglez. Mund t’i them se atje nuk ka Gjirin dhe nuk hahet mirë si tek ne, por përtej kësaj… Problemi ekonomik? Atje ka oferta më joshëse”.
Lexo më tej: Luis Enrique i bën dalje Napolit për Premier, De Laurentiis: "Mund t'i them që këtu hahet më mirë se në Angli"
Më pas, në realitet, Luis Enrique nuk do të shkonte në Angli, por nën Kullën Eiffel, gjithsesi shumë mirë i paguar. Fillimi për të te PSG nuk ishte i lehtë, deri në atë pikë sa që në tetorin e të njëjtit vit, De Laurentiis kishte thënë – duke iu kthyer çështjes së trajnerit ndërkohë që edhe Garcia kishte problemet e tij në Napoli (do të shkarkohej më 14 nëntor): “E kisha telefonuar Luis Enrique dhe më mirë që shkoi në Francë, shihni çfarë rezultatesh po bën. Ai nuk më kishte bindur as në diskutimet dialektike që patëm për tre ditë”. Ndoshta tani De Laurentiis e ka ndryshuar ca mendimin…
