Elsa Ulliri është caktuar nga shorti elektronik si kryesuesja e trupës gjykuese që do të gjykojë dosjes "Partizani". Bib Ndreca dhe Rudina Palloj janë caktuar si dy anëtarët e tjerë të trupës gjykuese. Ndërkohë nga ky short janë përjashtuar gjyqtarja Flojera Davidhi dhe Irena Gjoka.
Të pandehur për këtë dosje janë kreu i PD-së, Sali Berisha për korrupsion pasiv, dhëndri i tij Jamarbër Malltezi, dy biznesmenë dhe noterja. Më 30 maj, gjyqtarja Davidhi dorëzoi vendimin e zbardhur të seancës paraprake, që kaloi çështjen në gjyq, pas një zvarritjeje proceduriale që shkoi në shtatë muaj.
Kreu i Partisë Demokratike Sali Berisha dhe dhëndri i tij, Jamarbër Malltezi janë nën akuzë në lidhje me privatizimin e ish-kompleksit sportiv. Berisha ka deklaruar më herët se vendimi për masën e sigurisë “detyrim paraqitje” nga Apeli i Posaçëm për çështjen “Partizani” është një krim kushtetues.
Ai është shprehur se prokurorët e SPAK kanë kërkuar vendosjen e masave të sigurisë kundrejt tij me arsyetimin se ai po sulmon Prokurorinë e Posaçme dhe gjykatën. Berisha u lirua më 27 nëntor 2024, pas rreth një viti në arrest shtëpiak, për shkak të akuzave për përfshirje në dosjen “Partizani.”
