Aktori Devin Harjes, ka ndërruar jetë në moshën 41-vjeçare, pas një beteje të gjatë me kancerin.
Harjes, i njohur për rolin e boksierit legjendar Jack Dempsey në serialin popullor Boardwalk Empire, u nda nga jeta në spitalin Mount Sinai West në New York. Lajmi u konfirmua nga zëdhënësi i tij.
Përveç Boardwalk Empire, Harjes luajti në disa projekte të tjera, përfshirë dramën shkencore Manifest, ku interpretoi rolin e Pete Baylor, dhe serialet si Blue Bloods, Orange Is the New Black, Elementary dhe FBI.
Regjisori Antonio DiFonzo ka shprehur dhimbjen për ndarjen nga jeta të aktorit, përmes një postimi në Facebook:
“Lajm jashtëzakonisht i trishtuar pasi humbëm Devin Harjes, një aktor dhe mik i mrekullueshëm. Ai punonte vazhdimisht për t’u përmirësuar dhe jepte zemrën e shpirtin në gjithçka që bënte! Nuk do të të harrojmë kurrë dhe rolin tënd të jashtëzakonshëm në The Boyz of Summer dhe në jetët tona. Pushofsh në paqe, Zemër Luani!”
Devin Harjes la pas prindërit e tij, Randy dhe Rosanne Harjes, motrën Trish Harjes, si dhe macen e tij, Maude.
