Rei Manaj nuk ka zbritur në fushë me grupin për seancën e dytë stërvitore, kur Kombëtarja shqiptare e futbollit ka vijuar përgatitjet në “Shtëpinë e Futbollit” për ndeshjen e kualifikuesve të Botërorit 2026 ndaj Serbisë. Sulmuesi i Sivasspor është kapur nga një gjendje gripale dhe ka humbur seancën e të martës, por nuk duhet të ketë probleme për të qenë në fushë të shtunën.
Sylvinho është dashur të improvizojë në këtë rast edhe gjatë ndeshjes së kontrollit, me të cilën braziliani ka përmbyllur seancën, përveç ushtrimeve fizike e taktike. Daku ka qenë në qendër të sulmit të titullarëve, por gjërat mund të ndryshojnë deri të shtunën. Vihet re një tendencë e teknikut për të provuar edhe Brojën nga fillimi, por më parë talenti kuqezi duhet të japë garanci fizike.
Lexo më tej: “Të gjithë e dinë çfarë ndodhi”: Hysaj zbulon se çfarë i ka thënë Sylvinho lojtarëve
Sidoqoftë ka qenë një seancë më e plotë për brazilianin Sylvinho, që ka patur në dispozicion edhe Uzunin, Muçin, Ajetin dhe Asanin, të cilët nuk mbërritën në kohë në Shqipëri për të qenë pjesë e seancës së të hënës. Stafi teknik i Kombëtares i ka kushtuar vëmendje vëzhgimit të gjendjes fizike të lojtarëve, ndërsa u provuan skema të ndryshme taktike.
