Meghan Markle ka konfirmuar rikthimin e produkteve të saj nga marka “As Ever”, pas suksesit të menjëhershëm të lançimit të parë që u shit brenda 45 minutave.
Dukaesha e Sussex-it njoftoi përmes një postimi në Instagram më 3 qershor: “Për të gjithë ata që kanë pritur dhe janë kuriozë — faleminderit! Të preferuarat tuaja po rikthehen, së bashku me disa produkte TË REJA që mezi presim t’i ndajmë me ju. Gjatë këtij muaji... përgatituni!”
Ky njoftim vjen vetëm pak orë pas publikimit të një episodi të ri të podcast-it të saj, “Confessions of a Female Founder”, në bashkëpunim me Lemonada Media. Në episodin e fundit, Meghan tregoi se e kishte vendosur vetë pauzën pas lançimit fillestar për të siguruar që gjithçka të ishte “e qëndrueshme”.
Në një bisedë me Tina Knowles, nëna e Beyoncé-së, e cila foli për linjën e kujdesit për flokët të vajzës së saj “Cécred”, Meghan u ndal te sfidat e prodhimit në shkallë të gjerë. Ajo përmendi se edhe prodhimi i thjeshtë i një reçeli kërkon shumë testime, duke iu referuar produkteve të saj:
“Edhe reçeli ka rregulla të ngjashme me ato të FDA-së. Nuk është aq thjesht sa të thuash ‘I bëra vetë në shtëpi, mora disa luleshtrydhe dhe pak limon Meyer’... dhe pastaj përpiqesh ta bësh për treg dhe menaxhon pritshmëritë.”
Meghan shtoi se e kishte planifikuar markën për një vit dhe nuk e priste që gjithçka të shitej kaq shpejt:
“Ishte e mrekullueshme... por pastaj ndalesh dhe pyet veten: çfarë bëjmë tani? E rifurnizojmë sërish për ta shitur për një orë, apo kjo i bezdis klientët?”
