Ka dështuar konstituimi i Kuvendit të Kosovës edhe në përpjekjen e 26-të për vazhdimin e seancës.
Optimist që Kosova do të ketë institucionet e saj është kryetari i Nismës, Fatmir Limaj. Sipas tij, është e qartë se do të ekzistojë një marrëveshje politike.
“Dalëngadalë po afrohet koha që Kosova të ketë institucionet e saj. Është e qartë se do të kemi një marrëveshje politike që do t’i japë Kosovës institucionet e saj. Ne, si subjekt, kemi ofruar një mundësi mbi bazën e kapaciteteve tona, për të qenë të përgjegjshëm dhe për të dhënë kontributin tonë.”
Deputeti i Vetëvendosjes ka akuzuar ish-partitë opozitare se po e bllokojnë Kuvendin.
“Do të ishim bllokues sikur të mos e kishim propozuar Albulenën, siç ka bërë PDK në të kaluarën, duke e mbajtur të fikur Kuvendin për dy muaj, për shkak se nuk ka mundur të sjellë një propozim,” tha deputeti i LVV-së, Dimal Basha.
Deputetit Basha i reagoi menjëherë deputetja e AAK-së, Time Kadriaj.
“Arsyeja përse ne nuk po marrim pjesë në votim është e qartë: ka shkelje të Kushtetutës. Kalimi i votimit nga i hapur në të mbyllur është antikushtetues,” u shpreh deputetja e AAK-së, Time Kadriaj.
Seanca do të vazhdojë të enjten.
