Eight Mile Style ka ngritur një padi kundër Meta Platforms, kompania teknologjike që zotëron Facebook, Instagram dhe WhatsApp.
Kjo kompani botuese muzikore e ka akuzuar Metën për shkelje të të drejtave të autorit dhe po kërkon mbi 109 milionë dollarë në dëmshpërblim, sipas dokumenteve gjyqësore të siguruara nga revista PEOPLE.
Eight Mile Style është bashkëthemeluar nga ekipi i prodhimit të Eminem-it, Bass Brothers. Ajo kontrollon muzikën e reperit që është publikuar midis viteve 1995 dhe 2005. Eminem nuk është drejtpërdrejt i përfshirë në këtë padi.
Eight Mile Style pretendon se Meta ka shkelur të drejtat e autorit për 243 këngë nga katalogu i saj. Sipas padisë, Meta ka bërë këtë përmes “ruajtjes, riprodhimit dhe shfrytëzimit të paautorizuar” të këtyre këngëve në platformat e saj të ndryshme.
Pretendimet përfshijnë funksionalitete të ndryshme të aplikacioneve si “Original Audio” dhe “Reels Remix”, të cilat sipas padisë “lejojnë dhe inkurajojnë përdoruesit të vjedhin muzikën e Eight Mile Style” për ta përdorur në përmbajtjen e tyre “pa atribuim të duhur ose pa licencë”.
Sipas padisë, kjo ka çuar në një “ulje të vlerës së të drejtave të autorit për shkak të vjedhjes nga ana e të pandehurve, humbje fitimesh dhe përfitime që Meta i ka realizuar nga kjo shkelje”. Kompania po kërkon dëmshpërblime monetare dhe dënimin maksimal të përcaktuar me ligj.
Kompania e fituesit të çmimit Grammy kërkon 150,000 dollarë për secilën nga 243 këngët që janë përdorur në Instagram, WhatsApp dhe Facebook, duke arritur një total prej 109,350,000 dollarësh në dëmshpërblime. Eight Mile Style ka kërkuar gjithashtu një gjykim me juri.
Padia thekson se këngët e fituesit të çmimit Oscar “janë ndër më të vlefshmet në botë, dhe Eight Mile Style i mbron me shumë kujdes këto këngë ikonike.”
