Serbia vendos, Shqipërinë e presin në Rajko Mitic: stadiumi më sugjestionues në botë

Të luash në Beograd nuk ka qenë asnjëherë e lehtë. Ka qenë dikur, e është edhe sot, pavarësisht se Crvena Zvezda nuk është më ajo e kampionëve të dikurshëm. Rajko Mitic, i njohur më shumë si Maracana, është një nga stadiumet më sugjestionues të të gjitha kohërave. Kundërshtarët e Crvena Zvezdës nuk duhet ti bëjnë llogaritë vetëm me kundërshtarët në fushë, por edhe më tifozerinë e tmerrshme dhe tunelin e tij frikësues. Pikërisht aty, Federata serbe e futbollit ka vendosur të presë Shqipërinë në përballjen e 11 tetorit. I futur në histori për grafitet në gjuhë cirilike, mesazhe të qarta për ti bërë kundërshtarët të druhen e kalimi para forcave të policisë është lyer tashmë bardhekuq. Një tunel i gjatë, me shkallë që zbresin e ngjiten e ku fundi nuk duket kurrë, në kohën kur brohoritjet e egra të tifozëve sa vijnë e afrohen, duke i bërë të frikësohen 11 kundërshtarët e Zvedzës dhe Serbisë, në rastet kur luan kombëtarja.

"Tuneli i Ferrit"

I gjatë më shumë se 100 hapa, kalimi që përcjell lojtarët në fushën e lojës ka pësuar një fare ristrukturimi, por ruan me vete vite tradite e frike. Impianti i ndërtuar në 1961, që mban emrin e ish-futbollistit serb Rajko Mitic, është një fortesë që i jep krahë formacionit serb në Europë dhe jo vetëm. Uefa ka kërkuar me ngulm ndërhyrje në të gjithë strukturën, ndaj dhe nën-kalimi ku Gjimshiti e të tjerët do të ecin për të dalë në fushë në sfidën kualifikuese në Grupin K për Kupën e Botës është disi më elegant, por përsëri i mbushur me tension. Një ecje drejt ferrit konsiderohet dhe kuqezinjtë do të përjetojnë, pas ngjarjeve të 11 viteve më pare në stadiumin e Partizanit. Tifozeria që drejtohet nga Ivan Bogdanov i “tmerrshmi”, nuk e harron dronin me flamurin me simbolet shqiptare, ndaj ajo në Beograd vetëm një ndeshje e thjeshtë nuk do të jetë.

Rajko Mitic stadium tours are about to get busier. https://t.co/ZY44Q0qXwY

— Serbian Football (@SerbianFooty) December 13, 2023