Agjencia e Mbikëqyrjes Policore ka pezulluar nga detyra tre punonjës policie të Forcave të Posaçme “Shqiponja”. Pezullimi i tyre vjen pasi ata kanë ndaluar një automjet dhe me veprime arbitrare kanë kaluar në konfrontim fizik me drejtuesin e mjetit.
Për shkak të përplasjes, shoferi i automjetit përfundoi duke marrë trajtim mjekësor në spitalin e Traumës. Ndaj tre efektivëve rëndon vepra penale “Kryerje e veprimeve arbitrare në bashkëpunim”. Ky vendim i AMP vjen në zbatim të urdhrit të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, e cila ka caktuar masën e sigurimit personal “Pezullim i ushtrimit të një detyre a shërbimi publik” për tre efektivët.
