Joaquin Correa është një nga futbollistët që ka ndryshuar skuadër para Kupës së Botës për Klube. Argjentinasi ka lënë Interin dhe i ka thënë po Botafogos. Sulmuesi do të përpiqet të jetë protagonist dhe do të provojë ta bëjë këtë edhe kundër kundërshtarëve të nivelit shumë të lartë si PSG dhe Atletico Madrid.
Te Atletico luan një tjetër Correa, Angel. Do të jetë një përballje mes bashkëkombësve dhe miqve. Një gazetar, megjithatë, duke prezantuar këtë sfidë, i ka bërë ‘Tucu’ pyetjen se si do të jetë të përballet me vëllain. Një gabim i sikletshëm, një gafë gjigante që nuk ka kaluar pa u vënë re, edhe pse ish-lojtari zikaltër ia ka dalë mirë, e me një driblim nga të tijtë ka rikthyer të vërtetën.
Correa është transferuar te Botafogo për Kupën e Botës për Klube
‘Tucu’, pas një sezoni si figurë dytësore te Inter (22 ndeshje dhe 2 gola, kurrë titullar i padiskutueshëm), ka vendosur të pranojë ofertën e Botafogos, me të cilën do të debutojë drejtpërdrejt në Kupën e Botës për Klube. Skuadra braziliane nuk ka qenë me fat, pasi është një nga të paktat që ka rënë në një grup me dy skuadra europiane (PSG dhe Atletico Madrid), përveç Seattle.
Gafa e gazetarit: “Si do të jetë të përballesh me vëllain tënd”
Correa është një nga yjet e skuadrës, është prezantuar në mënyrë madhështore, madje në Hollywood, dhe në prag të turneut ka dhënë disa intervista, në njërën prej të cilave ka përjetuar një moment krejtësisht të sikletshëm. Sepse ndodhi diçka që nuk do ta harrojë lehtë.
Një gazetar e pyeti: “Si do të jetë të përballesh me vëllain tënd, Angel Correa, të Atletico Madrid?”. Ish-lojtari i Inter dhe Lazios mbeti i habitur, por nuk e humbi qetësinë, duke u përgjigjur ftohtë: “Nuk është vëllai im”. Gazetari ngul këmbë: “Më fal, por a nuk është edhe ai Correa?”. Joaquin Correa detyrohet të shpjegojë: “Po, kemi të njëjtin mbiemër, nuk është vëllai im. Por është mik”.
Një gafë e sikletshme nga ana e gazetarit, i cili ndoshta pas asaj pyetjeje do të kishte dashur të zhdukej. Angel dhe Joaquin Correa janë të dy argjentinas, kanë qenë shokë skuadre në kombëtare, dhe siç tha ‘Tucu’, janë miq, por nuk janë vëllezër. Dhe kush e di nëse do të bëjnë ndonjë shaka për këtë ngatërresë kur të përballen në ndeshjen e tretë të Kupës së Botës për Klube.
