Tel Avivi pretendon se ka eliminuar një figurë kyçe të Gardës Revolucionare, të përfshirë në armatosjen e Hamasit
Ministri i Mbrojtjes i Izraelit, Israel Katz, deklaroi të shtunën se Forcat e Mbrojtjes izraelite (IDF) kanë vrarë një komandant të lartë iranian gjatë një sulmi ajror ndaj një apartamenti në qytetin Qom të Iranit, sipas raportimeve nga mediat vendase dhe agjencisë Reuters.
Sipas Katz, komandanti Saeed Izadi ka qenë përgjegjës për financimin dhe armatosjen e Hamasit përpara sulmeve të 7 tetorit ndaj Izraelit. “Ky është një sukses i madh për inteligjencën izraelite dhe Forcën Ajrore. Drejtësi për të vrarët dhe pengjet. Dora e gjatë e Izraelit do të arrijë çdo armik,” u shpreh ai.
Izadi ishte pjesë e Forcës elitare Quds, një degë e Gardës Revolucionare Islamike të Iranit (IRGC), e cila merret me operacione jashtë vendit dhe mbështet grupet aleate të Iranit në rajon.
Deri tani, Garda Revolucionare Iraniane nuk ka konfirmuar zyrtarisht vdekjen e Izadit.
