E ardhmja e Cristiano Ronaldos është përcaktuar. Nuk ka dyshime për qëndrimin e tij te Al-Nassr pas zyrtarizimit të rinovimit të kontratës deri në vitin 2027. Vazhdohet kështu bashkëpunimi mes kampionit portugez 40-vjeçar dhe klubit të Arabisë Saudite, i cili do t’i garantojë atij një pagë të turpshme, sidomos nëse krahasohet me atë të yjeve të futbollit europian. Shifrat janë monstruoze, edhe për një futbollist të mësuar të përfitojë paga të konsiderueshme.
Sa fiton Cristiano Ronaldo te Al Nassr, paga e re
Cristiano Ronaldo ka firmosur atë që është kontrata më e pasur në historinë e një futbollisti. Për ta bindur të firmosë sërish me Al-Nassr i janë garantuar shuma të jashtëzakonshme parash. Praktikisht, paga vjetore e ish-lojtarit të Sporting, Manchester United, Real Madrid dhe Juventus duhet të arrijë në 200 milionë euro. Sikur të mos mjaftonte, sipas asaj që raporton Marca, do të duhen shtuar edhe rreth gjashtëdhjetë milionë euro nga të drejtat e imazhit.
Shifrat e sakta të pagës së Cristiano Ronaldos, sa do të përfitojë në ditë
Për të kuptuar përmasat e fitimit të Cristiano Ronaldos në aventurën e tij të “re” te Al-Nassr, mjafton të ndash pagën. Sipas llogarive, CR7 do të xhepojë rreth 16,67 milionë euro në muaj, 4,167 milionë euro në javë, 595.357 euro në ditë, 24.806 euro në orë, 413,4 euro në minutë, 6,89 euro në sekondë. Pra, është e lehtë ta quash sërish një “Paperone” të futbollit.
E ka fituar kështu sfidën në distancë me antagonistin e tij të përhershëm Leo Messi. Sulmuesi argjentinas i Inter Miami fiton pak më pak se 18 milionë euro në sezon. Një shifër që megjithatë nuk përfshin të ardhurat nga sponsorizimet. I afrohet Ronaldos ish-shoku i tij i Real Madridit, Karim Benzema, tani kundërshtar në kampionatin arab. Për të, pagë prej 100 milionë eurosh në sezon me Al-Ittihad. Shumë më larg është lojtari më i paguar në Europë, pra Mbappé, i cili te Real do të përfitojë pak më shumë se 20 milionë euro.
