Këngëtarja e njohur kanadeze Grimes ka reaguar ashpër ndaj rrjeteve sociale këtë javë, duke kritikuar hapur platformën X (ish-Twitter), e cila është në pronësi të ish-partnerit të saj, miliarderit Elon Musk.
Në një postim të gjatë, artistja 37-vjeçare shkruan se rikthimi në rrjet pas një pauze të gjatë e ka bërë të kuptojë thellësisht dëmin që po shkaktohet:
“Është tmerrësisht e qartë që ky vend – dhe të gjitha këto platforma – janë helm. Janë burgje me përmbajtje të shkurtër që tingëllon e thellë, por nuk ka asnjë kuptim real. Truri yt e hedh tej duke menduar se po mëson diçka. E gjithë kjo është një teatër, një imitim i zbehtë dhe i mjerë i jetës.”
Grimes ka qenë larg rrjeteve për një kohë të pacaktuar, por që në muajin prill ajo kishte shprehur mendime të ngjashme:
“Më duket shumë jo e shëndetshme të jesh në rrjete sociale. Ndjehet si një qytet fantazmë i depresionit, hidhërimit dhe fotove të grave të bukura që bëjnë gjëra seksuale. Është një dështim moral i madh nga të gjitha këto aplikacione, dhe po i shkakton dëm të madh shoqërisë.”
Në një tjetër postim të mëparshëm, ajo zbuloi se ishte diagnostikuar me ADHD dhe autizëm, duke theksuar se kishte qenë me fat që u rrit në një kohë kur rrjetet sociale nuk ekzistonin.
“Nënkultura e ‘shëndetit mendor’ në rrjetet sociale është shqetësuese. Shumë prej tyre janë antishoqërore dhe duket sikur janë krijuar për të përkeqësuar njerëzit,” shtoi ajo.
