Aktori i njohur i “Pirates of the Caribbean”, Johnny Depp, ka rrëfyer së fundmi se si fëmijëria e tij e vështirë dhe abuzive ka ndikuar drejtpërdrejt në mënyrën se si ai vendosi të rrisë fëmijët e tij.
Në një intervistë për The Telegraph, të publikuar më 5 korrik, Depp foli hapur për marrëdhënien e tij me nënën e ndjerë, Betty Sue Palmer, duke e përshkruar si të dhunshme fizikisht dhe emocionalisht.
“Më rrihte me çdo gjë që i dilte përpara – një shkop, një këpucë, një tabakë cigare, madje edhe një telefon,” – tha aktori.
“Por i jam mirënjohës. Ajo më mësoi si të mos rris fëmijët e mi. Thjesht bëj të kundërtën e asaj që bëri ajo.”
Edhe pse më vonë u bë i afërt me nënën e tij, e cila ndërroi jetë në vitin 2016 në moshën 81-vjeçare, Depp ka folur më herët për traumën që i la fëmijëria.
Gjatë gjyqit të famshëm për shpifje ndaj ish-bashkëshortes Amber Heard në 2022, ai tregoi se nëna e tij ishte "e dhunshme dhe mizore" ndaj tij dhe motrës së tij, Christi Dembrowski.
“Abuzimi verbal dhe psikologjik ishte më i keq se dhuna fizike,” – u shpreh Depp.
“Dhimbjen fizike e mëson si ta durosh. Por fjalët, të copëtojnë brenda.”
Dembrowski, motra e aktorit, dëshmoi në gjyq se nëna e tyre ishte shpesh e dhunshme. Ajo tregoi se asnjëri prej tyre nuk u përgjigj kurrë me dhunë.
“Që kur ishim të vegjël, vendosëm se kur të kishim shtëpinë tonë, nuk do të përsërisnim kurrë atë që përjetuam në fëmijëri.”
