“E prisja të vështirë, duke parë edhe dëmtimin e Ndrecës, ishim të detyruar të fusnin Selmanin mbrojtës linje. Na u prishën ekulibrat, nuk e kishim përgatitur ndeshjen kështu. Pjesën e dytë ishim superiorë, ishim përpara portës. Jam i kënaqur nga rezultati”. Kështu është shprehur pas fitores në ndeshjen e parë të raundit të parë në Champions Edlir Tetova. Tekniku i Egnatias i gëzohet suksesit 1-0 të vendosur nga Gruda, i ardhuri i fundit i merkatos. “Jam i kënaqur nga afrimet e verës, janë lojtarë që ishin në listën time. Akoma nuk janë në ritmin e skuadrës, por sot bënë shumë mirë”.
Keqardhja është e gjitha në këtë pikë për dëmtimin e Ndrecës, që sapo ishte rikuperuar dhe kartoni i kuq në pankinë për Regi Lushkjan, që do të mungojë në kthimin kundër Breidablik: “Nuk kam informacion shumë të saktë për Ndrecën – tha Tetova -, por mendoj këmba e vjetër, po ai dëmtim që ka pasur. Nuk mendoi se ndikoi euforia. Na u prish një plan, por kishim planin B. Për momentin nuk kishim zëvendësues për Ndrecën. E kemi marrë mbrojtësin, por nuk është në këtë turn për çështje dokumentash”.
Lexo më tej: Debutim ëndërrash në Champions,Gruda i jep fitoren Egnatias: Breidablik bie në shtesë
Ndeshja e ardhshme në transfertë natyrisht që nuk parashikohet e lehtë, me islandezët që janë me kampionatin në zhvillim. "I vetmi shqetësimi është ritmi i kundërshtarëve. Në transfertë do të jetë një ndeshje më e kujdesshme. Egnatia e menaxhoi shumë mirë, goditëm traversën. Gjithçka ngelët e hapur në ndeshjen tjetër” e mbylli Tetova.
