Vijon prej dy ditësh zjarri në malin e Dukatit duke djegur një sipërfaqe të konsiderueshme në zonë. Flakët kanë shkrumbuar mbi 160 hektarë me bimësi të dendur, shkurre dhe pyje me pisha. Ndërhyrja është shumë e vështirë për shkak të terrenit të thepisur në zonë.
Zjarri rrezikon të përhapjet në drejtim të Parkut Kombëtar të Llogarasë, një zonë me rëndësi të lartë ekologjike dhe natyrore. Vija e zjarrit është e gjatë rreth 3 deri në 4 kilometra dhe ka degëzime të shumta që mund të përhapen më tej për shkak të erës dhe terrenit të thyer malor. Krahu jugor i zjarrit, i cili ndodhet më pranë zonës së mbrojtur të Llogarasë, konsiderohet si më kritik dhe po mbahet nën monitorim të vazhdueshëm.
Vështirësitë për ndërhyrje janë të shumta. Terreni i thepisur, mungesa e rrugëve të aksesueshme dhe mungesa e burimeve ujore në afërsi kanë detyruar zjarrfikësit të punojnë me mjete dore si lopata, kazma dhe pompa shpine. Temperaturat e larta dhe era e fortë përkeqësojnë më tej situatën. Në terren ndodhen mbi 15 forca zjarrfikëse,ndërsa gjatë ditës se djeshme është ndërhyrë edhe nga ajri me helikopter.
