Sipas raportimeve nga Daily Mail, Selena Gomez dhe producenti muzikor Benny Blanco do të kurorëzojnë dashurinë e tyre në një dasmë madhështore që do të zgjasë dy ditë në muajin shtator, në Montecito të Kalifornisë.
Një burim për mediat thekson se: “Dasma do të jetë një ceremoni intime, vetëm për familjarët dhe miqtë më të afërt, por shumë prej tyre janë yje të mëdhenj.” Mes të ftuarve janë konfirmuar edhe mikja e ngushtë e Gomez, Taylor Swift, dhe partneri i saj, Travis Kelce.
Ftesat janë dërguar tashmë dhe lista përfshin gjithashtu kolegë të Gomez nga seriali “Only Murders in the Building”, si dhe emra të njohur të industrisë muzikore, miq dhe bashkëpunëtorë të ngushtë të Blanco.
Sipas burimeve të tjera, muaji shtator është zgjedhur për shkak të axhendës së ngarkuar të çiftit, veçanërisht për Gomez, e cila pritet të ketë angazhime intensive gjatë vjeshtës dhe dimrit.
“Selena është shumë e lumtur që është e fejuar, por gjithmonë ka ëndërruar një martesë të bukur,” tha një tjetër burim për Daily Mail.
Çifti konfirmoi fejesën në dhjetor të vitit 2024, pas më shumë se një viti lidhjeje. Së fundmi, Benny Blanco ka deklaruar se ceremonia e tyre do të jetë “chill, por e mrekullueshme”.
