Efekti i Shqipërisë, si destinacion turistik bregdetar, duket se po zvogëlohet. Ose më mirë, nuk tërheq më atë pjesë të klientelës italiane që gjatë tre viteve të fundit e gjeti të arsyeshme të kalojë pushimet përtej Adriatikut. "Në të vërtetë," thotë Michele Viola, pronar i operatorit turistik Goodays, "që në fund të sezonit të kaluar veror kishim vënë re një rënie të parë. Tendenca që u përsërit në mënyrë të konsiderueshme në vitin 2025: pak njerëz po telefonojnë për të rezervuar detin shqiptar, grupet preferojnë të shkojnë në destinacione të tjera."
Numrat, të paktën ata të agjencisë nga Bari, tregojnë një rënie krahasuar me tre vite më parë kur "italianët që udhëtonin drejt detit shqiptar ishin në rritje me 30 për qind, falë një fluksi të madh të nxitur nga përballueshmëria ekonomike dhe bukuritë e natyrës."
"Duhet të jemi të qartë," vazhdon Viola, "dhe të shpjegojmë që të ardhurat e familjeve italiane po ulen vazhdimisht dhe shkuarja në pushime është një problem. Kështu që, nëse më parë në Shqipëri kishte një avantazh në lidhje me raportin mes çmimeve dhe shërbimeve, tani kjo lidhje nuk funksionon më. Si rezervime, jemi shumë poshtë gjysmës së asaj që kishim para tre viteve. Agjencia jonë po punon mirë me turizmin e organizuar. Nga Egjipti në Dubaj deri në Spanjë. Të ardhurat totale janë rritur falë kësaj specializimi. Tendenca e atyre që nuk shkojnë jashtë vendit është të qëndrojnë në Puglia, ndoshta duke shfrytëzuar fundjavat në vendpushime bregdetare dhe duke u mbështetur në Bed&Breakfast."
"Shqipëria," - thotë Massimo Salomone, koordinatori i sektorit të turizmit në Confindustria Puglia dhe presidenti i sektorit të Turizmit në Confindustria Bari dhe Bat- "sigurisht është rritur si destinacion, mbështetur nga investime infrastrukturore të shpejta dhe një burokraci më të thjeshtë, por ekuacioni me ‘low-cost’ është shpesh i gabuar. Ka aspekte të destinacionit shqiptar, si shërbimet, transparenca e çmimeve dhe cilësia e ofertës turistike, që kërkojnë shumë kujdes, siç janë raportuar nga disa udhëtarë. Qëllimi ynë nuk është të theksojmë konkurrencën, por përkundrazi të ndërtojmë një sinergji pozitive. Puglia dhe Shqipëria ndajnë detin Adriatik dhe një pasuri kulturore historike që mund të bëhet një motor i projekteve të integruara, si në fushën e turizmit ashtu dhe në atë të infrastrukturës. Megjithatë, është e rëndësishme të sqarohet se Italia (dhe veçanërisht Puglia) mbetet një destinacion shumë i dashur nga turistët italianë."
Përfundimisht, ka një problem të rritjes së kostove që ndikon në klasën e mesme. "Pjesa e klientelës e gatshme të tolerojë një shërbim më pak efikas në këmbim të një çmimi të përballueshëm, duket se nuk gjen më nxitje të mjaftueshme, sepse pret një kursim më të madh. Duket se çmimet në Shqipëri janë rritur dhe kjo po dekurajon” thotë Piero Innocenti, presidenti i dytë i Fiavet Puglia.
Kjo ndodh edhe për destinacione të tjera si Kroacia dhe Mali i Zi, ndërsa Greqia po qëndron mirë./Corriere della Sera/
