Shqiptari Bledar Lala i identifikuar si drejtues i operacioneve të një grupi të organizuar të trafikimit në Belgjikë është prekur nga hyrja në fuqi e sanksioneve që godasin rrjetet e trafikimit të emigrantëve të paligjshëm në Britaninë e Madhe. Sipas raportimeve, masat godasin 25 individë dhe entitete, përfshirë një furnizues varkash të vogla në Azi dhe drejtues bandash në Ballkan dhe Afrikën e Veriut.
Në shënjestër janë vendosur edhe ndërmjetës që përdorin sistemin e transferimit të parave “Hawala” në Lindjen e Mesme, i cili është përdorur për pagesa të lidhura me kalimet ilegale përmes Kanalit të La Manshit. Sekretari i Jashtëm britanik, David Lammy, e cilësoi këtë si një moment historik në përpjekjet e Qeverisë për të luftuar krimin e organizuar të emigracionit dhe për të ulur emigrimin e parregullt drejt MB-së.
“Qoftë në Europë apo në Azi, ne po e çojmë luftën te trafikantët që mundësojnë emigrimin e paligjshëm, duke i goditur kudo që ndodhen dhe duke i detyruar të përgjigjen për veprimet e tyre”, tha ai.
