Një aksident i rëndë ka ndodhur paraditen e sotme në Urën e Kardhiqit, në aksin Gjirokastër-Tepelenë. Si pasojë kanë mbetur të lënduar tre persona, dy drejtues të automjeteve të përfshira në aksident dhe pacienti i cili po transportohej me autoambulancën e përfshirë në aksident.
Bëhet e ditur nga veprimet paraprake hetimore se njëri prej makinave i ka prerë rrugën autoambulancës së Spitalit të Tepelenës. Për pasojë autoambulanca pas përplasjes ka përfunduar anash rrugës, ndërsa automjeti është dëmtuar në pjesën e përparme.
Kjo e fundit vinte nga drejtimi jugor, ndërsa autoambulanca transportonte një pacient në Reanimacionin e Spitalit të Gjirokastrës. Pacienti pas përplasjes është dëmtuar edhe më shumë, ndërsa kanë ngelur të lënduar lehtë dy drejtuesit e mjeteve respektive. Policia po heton për të zbuluar shkaqet e aksidentit.
