Ekziston kampionati më i shkurtër në botë? Përgjigjja është po: në Groenlandë. Ishulli më i madh në botë ndodhet mes Oqeanit Atlantik dhe Oqeanit Arktik, në lindje të arkipelagut arktik kanadez. Përveç peizazheve të mrekullueshme, sot tërheq vëmendje në mënyrën e vet edhe në botën e futbollit. Kjo sepse kampionati vendas luhet me një format me tetë skuadra të ndara në dy grupe me nga katër. Secila përballet një herë me çdo skuadër tjetër të grupit duke zhvilluar gjithsej tre ndeshje.
Dy të parat e çdo grupi kalojnë në gjysmëfinale, që zhvillohen me ndeshje teke, dhe fitueset luajnë finalen të dielën që vjen, po ashtu me një ndeshje të vetme. Në thelb kampionati zhvillohet nga e marta deri të dielën, me një ditë pushim të premten. Më shumë ngjan me një turne, por në realitet është kampionati zyrtar vendas që do të nisë sezonin e ri në kryeqytetin Nuuk.
Lexo më tej: E nis Superiorja, Superkupa trofeu i fundit i vitit: FSHF vendos datat e kampionateve
Futbolli në Groenlandë është shumë i rëndësishëm, edhe pse kampionati më i lartë kombëtar është në thelb një turne krejtësisht amator. Lojtarët e skuadrave pjesëmarrëse e paguajnë vetë për të udhëtuar në ndeshjet jashtë fushe dhe për të përballuar kostot e ndryshme të transportit që sjellin udhëtimet nga një qytet në tjetrin. “Çdo fluturim kushton më shumë se 1000 euro,” shpjegon një tifoze e re që rrëfen futbollin në Grenlandë për gazetën spanjolle ‘MARCA’. Aqqalu Olaf, një lojtar i kampionatit groenlandez, shton se nuk ka zbritje për banorët.
Si përbëhet kampionati në Groenlandë
Sezoni i kaluar kampionati u zhvillua tërësisht në qytetin Qeqertarsuaq, gjë që nganjëherë nënkuptonte “të kombinoje një fluturim me deri në tre ditë udhëtim me traget për të mbërritur atje,” shpjegon lojtari. Edhe pse organizatorët e ngjarjes, Federata e Futbollit të Groenlandës, janë përgjegjës për akomodimin e të gjithë lojtarëve pjesëmarrës, dy skuadra të regjistruara nuk mundën të marrin pjesë për shkak të mungesës së lojtarëve të gatshëm për të përballuar shpenzimet: UB-83, nga qyteti Upernavik, dhe N-48, nga qyteti Ilulissat. Këtë vit kampionati më i shkurtër në botë do të nisë në Nuuk.
