Gjykata e Lartë ka rrëzuar kërkesat e Arnold Rrokajt dhe Zambak Gjonit. Ata kërkuan heqjen e masës arrest me burg caktuar ndaj tyre në prill të këtij viti.
Gjoni dhe Rrokaj janë vënë në pranga pasi ata kanë hakuar më 12 mars emailet e 3 prokurorëve të SPAK. Hakerët nuk kanë mundur të depërtojnë në sistemin e brendshëm të IT-që sipas SPAK ishte i pacënuar, por kanë arritur që të marrin të dhënat nga adresat e emaileve të disa prokurorëve. SPAK shpjegoi pas arrestimit të tyre se nuk ka patur rrjedhje të dosjeve hetimore. Hakerat kanë tentuar që të ndërhyjnë edhe në emailin e kryeprokurorit Altin Dumani, por sipas SPAK nuk kanë pasur sukses falë masave të sigurisë.
Ata pasi kanë marrë akses të emaileve kanë shpërndarë dokumentet te disa persona të tjerë, të cilët dyshohet se janë dy gazetarë, ish-kreu i burgjeve, Agim Ismaili, si dhe Dritan Palnikaj, aktualisht sekretar i Përgjithshëm në Ministrinë e Bujqësisë.
