Përkrenarja dhe shpata e shtatores së Gjergj Kastriot Skënderbeut në qendër të Prizrenit u vandalizua dhe lye me bojë.
Veprim i paautorizuar ka shkaktuar reagime të forta publike pasi konsiderohet si akt që cenon simbolet kombëtare dhe ndërgjegjen historike të shqiptarëve.
Qytetarë dhe intelektualë prizrenas kanë reaguar, duke dënuar ashpër çdo ndërhyrje që ndan shoqërinë dhe cenon figurat historike.
Komuna e Prizrenit ka sqaruar po ashtu se ky veprim nuk është pjesë e asnjë procesi zyrtar restaurimi. Ai është kryer pa lejen e Komunës dhe konsiderohet ndërhyrje e papranueshme, thuhet në një deklaratë të tyren. Policia e Kosovës ka nisur hetimet për të identifikuar autorët e këtij akti.
Komuna ka theksuar se çdo ndërhyrje në simbolet historike duhet të bëhet vetëm përmes rrugëve institucionale dhe me respekt të plotë për rëndësinë e tyre kombëtare.
Në këtë shesh ku qëndron shtatorja e Skënderbeut, nuk ka vend për veprime të njëanshme apo të paautorizuara. Heroi kombëtar është simbol i unitetit shqiptar dhe çdo ndërhyrje mbi figurën e tij duhet të trajtohet me përgjegjësi të plotë. /TCH
