Policia ka shpallur në kërkim 36-vjeçarin Klodian Steli, banues në Fushë-Krujë, si i dyshuar se ka vendosur një sasi lënde plasëse në portën e garazhit të Elvis Kosovës. Blutë informojnë se kanë gjetur automjetin me të cilin 36-vjeçari lëvizi gjatë kryerjes së krimit. Ngjarja ndodhi më datë 24 korrik 2025, në rrugën “Peti” në Tiranë. Në portën hyrëse të garazhit të Elvis Kosovës u vendos një sasi lënde plasëse.
“Identifikohet dhe shpallet në kërkim autori i dyshuar. Gjendet dhe automjeti me të cilin ky shtetas lëvizi gjatë kryerjes së krimit. Si rezultat i hetimeve të thelluara, të kryera nga shërbimet e Komisariatit të Policisë Nr. 1, me qëllim zbardhjen dhe dokumentimin e plotë të ngjarjes së ndodhur më datë 24.07.2025, në rrugën “Peti”, ku në portën hyrëse të garazhit të shtetasit E. K. u vendos një sasi lënde plasëse, kanë identifikuar dhe shpallur në kërkim autorin e dyshuar të ngjarjes, shtetasin: K. S., 36 vjeç, banues në Fushë Krujë”, njoftojnë blutë.
