Kryeministri izraelit Benjamin Netanyahu deklaroi se Izraeli synon të marrë kontrollin e plotë ushtarak të Rripit të Gazës, por pa e aneksuar territorin. Në një intervistë për Fox News dhe agjencinë indiane CNN-News18, ai theksoi se qëllimi nuk është të qeveriset Gaza nga Izraeli, por të kalojë nën një “strukturë të përkohshme administrative”, pa e specifikuar se cili do të jetë ky autoritet.
“Ne nuk duam ta mbajmë Gazën, nuk duam ta qeverisim, por duam një perimetër sigurie”, tha Netanyahu. Ai nënvizoi se, pas kontrollit ushtarak, Gaza do t’i kalojë në administrim forcave që mund ta qeverisin në mënyrë të duhur.
Netanyahu përsëriti gjithashtu dy objektivat kryesore të Izraelit: shkatërrimin e plotë të Hamasit dhe kthimin e pengjeve të mbetura pa kushte.
Ndërkohë, Këshilli i Sigurisë i Izraelit pritet të mblidhet gjatë ditës për të diskutuar një vendim të mundshëm për okupim të plotë ushtarak të Gazës, një veprim që, sipas burimeve izraelite, është tashmë drejt finalizimit.
