Gjermania ka ndërmarrë hapin më të qartë deri tani në qëndrimin e saj ndaj ofensivës izraelite në Gaza, duke ngrirë çdo eksport armësh që mund të përdoret në këtë zonë. Ky vendim i Kancelares Friedrich Merz shënon një kthesë të ndjeshme në politikën e Berlinit ndaj një prej aleatëve të tij më të ngushtë, mes presionit të brendshëm dhe kritikave ndërkombëtare për rritjen e viktimave civile dhe bllokimin e ndihmave humanitare.
Shkruan Politico:
Gjermania do të pezullojë eksportet e armëve drejt Izraelit që mund të përdoren në Rripin e Gazës, njoftoi të premten Kancelari Friedrich Merz, duke shënuar kthesën më të qartë të Berlinit deri tani në përgjigje të fushatës ushtarake në rritje të Izraelit.
“Në këto rrethana, qeveria gjermane, deri në një njoftim të dytë, nuk do të miratojë asnjë eksport pajisjesh ushtarake që mund të përdoren në Rripin e Gazës,” tha Merz në një deklaratë për shtyp të qeverisë. Ai shtoi se operacionet e intensifikuara të Izraelit në Gaza, të miratuara nga kabineti i tij gjatë natës, e bëjnë “gjithnjë e më të vështirë” të shihet se si objektivat e deklaruara, si lirimi i pengjeve ose çarmatimi i Hamasit, mund të arrihen.
Ky veprim nuk shkon deri në një embargo të plotë armësh dhe lë të hapur mundësinë e vazhdimit të eksporteve për sisteme që nuk lidhen me fushatën në Gaza, si mbrojtja raketore ose pajisjet detare.
Gjermania ka theksuar prej kohësh të drejtën e Izraelit për vetëmbrojtje dhe përsëriti të premten se “çarmatimi i Hamasit është thelbësor.”
Megjithatë, Merz kritikoi ashpër pasojat humanitare të ofensivës së planifikuar nga Izraeli, duke i bërë thirrje qeverisë që të lejojë “akses të plotë për dërgesat e ndihmës, duke përfshirë organizatat e OKB-së dhe institucionet e tjera joqeveritare.”
“Qeveria izraelite mban përgjegjësi më të madhe se kurrë për furnizimin e popullsisë civile,” tha Merz.
Gjermania është një nga partnerët më të ngushtë të Izraelit në fushën e mbrojtjes në Europë. Ngrirja prek vetëm miratimet për eksportet e reja të armëve. Dërgesat nga marrëveshjet e mëparshme mund të vazhdojnë, por nëse armët mund të përdoren në Gaza, edhe ato dërgesa mund të pezullohen.
Ky njoftim vjen pas një presioni në rritje në Gjermani për të rishikuar transferimet e armëve, mes raportimeve për rritje të viktimave civile dhe akses të kufizuar për ndihmën humanitare në Gaza.
Merz gjithashtu paralajmëroi Izraelin kundër hapave “drejt aneksimit të Bregut Perëndimor,” duke sinjalizuar se Berlini po monitoron zhvillimet përtej luftës aktuale.
Përgatiti ©LAPSI.AL
