Kryetari i grupit parlamentar të PD, Gazment Bardhi e cilësoi fikjen arbitrare të sinjalit të News24 dhe rrethimin me forca policore të redaksive si një akt të qartë hakmarrjeje politike nga Belinda Balluku.
Bardhi ka risjellë shkrimin e publikuar në Gazetën Shqiptare në 8 gusht, që sipas tij solli hakmarrjen e Ballukut ndaj News24 një ditë më pas, mëngjesin e 9 gushtit.
“Në datën 8 gusht 2025, ora 18:40, Gazeta Shqiptare, pjesë e “Focus Group Media”, publikoi shkrimin për komunikimin e pritshëm të akuzës nga SPAK për ZëvendësKryeministren Belinda Balluku. Në datën 9 gusht 2025, ora 07:00, shoqëria shtetërore “KAYO” sh.a., ku rezulton se kryetar i Këshillit Mbikëqyrës është Ermal Nufi urdhëron zabtimin e të gjitha pronave ku ushtrojnë veprimtarinë mediatike News 24, Balkanweb, Gazeta Shqiptare dhe Panorama, pavarësisht se pjesa dërrmuese e tyre as nuk i kanë kaluar në administrim shoqërisë shtetërore “KAYO” sh.a. (pronat janë me qira të vlefshme deri në vitin 2033, me nje vlerë vjetore qiraje 180 mijë euro, siç konfirmonte edhe vetë MEKI në një deklaratë zyrtare)”, shkruan Bardhi.
Në shkrimin e Gazetës Shqiptare, Balluku përmendet si figura kryesore në një hetim penal të thelluar që lidhet me korrupsion, shpërdorim detyre, abuzim me fondet publike dhe skandale të shumta që prekin sektorin e infrastrukturës dhe energjisë.
