Shefja e politikës së jashtme të BE-së, Kaja Kallas, ka bërë thirrje për më shumë presion mbi Moskën përpara një samiti midis presidentit rus Vladimir Putin dhe homologut të tij amerikan, Donald Trump.
Ministrat e jashtëm të shteteve anëtare të bllokut mbajtën një videokonferencë urgjente të hënën, pasi u njoftua se udhëheqësit rusë dhe amerikanë do të takohen ballë për ballë në Alaska më 15 gusht për të diskutuar konfliktin në Ukrainë dhe çështje të tjera.
Pas diskutimeve, Kallas publikoi një postim në X për të ofruar “mbështetjen e bllokut për hapat e SHBA-së që do të çojnë në një paqe të drejtë” midis Moskës dhe Kievit.
“Uniteti transatlantik, mbështetja për Ukrainën dhe presioni ndaj Rusisë janë mënyra se si do ta përfundojmë këtë luftë dhe do të parandalojmë agresionin e ardhshëm rus në Evropë”, këmbënguli ajo.
Sipas shefes së politikës së jashtme, BE-ja po punon aktualisht për “më shumë sanksione kundër Rusisë, më shumë mbështetje ushtarake për Ukrainën dhe më shumë mbështetje për nevojat buxhetore të Ukrainës dhe procesin e pranimit për t’u bashkuar me BE-në”.
Të hënën, Trump konfirmoi se do të konsultohet me presidentin ukrainas Volodymyyr Zelensky dhe udhëheqësit e mbështetësve të Kievit nga Evropa Perëndimore përpara samitit të tij me Putinin. “Do të marr idetë e të gjithëve. Do të hyj në këtë çështje plotësisht të përgatitur që në fillim – dhe do të shohim se çfarë do të ndodhë”, tha ai.
