Në një bashkëbisedim në Facebook me publikun, kryeministri Edi Rama iu përgjigj pretendimeve se udhëton me avion privat, ndërkohë që shteti nuk ka avionë për shuarjen e zjarreve. Kryeministri tha se avionin me të cilin ka kontratë qeveria, ai e përdor vetëm për udhëtimet zyrtare, ndërsa kur i duhet të udhëtojë për vizita private, ai gjithmonë udhëton me avionët e linjës si të gjithë qytetarët e tjerë.
“Po të kishim vetë avionët tanë do ishte më mirë, askush nuk e mohon këtë. Por kush i bën llogaritë duhet t’i rikthehet pak llogarive për të kuptuar se avionët nuk janë një fjalë goje. Ka dhe diçka tjetër, disa pa mendje apo nga dëshira për ta besuar, kanë ngrënë edhe broçkullën e madhe që unë dhe qeveria paskemi blerë avionë për vete. Nuk ka asnjë avion të blerë për vete. E përsëris, se avioni i shumëpërfolur i përdorur nga unë vetëm për udhëtimet zyrtare, vetëm për udhëtimet zyrtare sepse në çdo udhëtim tjetër privat unë marr avionët e linjës dhe jam rregullisht bashkë me familjen në ekonomik, gjithmonë" tha Rama.“Këtë e dëshmojnë të gjitha biletat e deklaruara dhe janë të verifikueshme. Avioni i përdorur për udhëtimet zyrtare nuk i ka kushtuar dhe nuk i kushton shtetit shqiptar më shumë se sa shumatorja e shpenzimeve mesatare të kryera çdo vit nga Kryeministri i Shqipërisë, përfshirë, me nder jush, edhe paraardhësin tim”, shtoi kreu i qeverisë.
Për udhëtimet e Ramës ka pasur debate dhe akuza të shumta, por kryeministri gjithnjë ka refuzuar t'i hapë rrugë hetimit parlamentar për kontratën e qeverisë me Air Albania. Ajo çfarë është raportuar me herët në media është se “kostot e marrjes me qira të një aeroplani Airbus 319, listohen në 15 mijë euro në orë”. Së fundmi Rama shpërndau në media një foto ku ishte duke udhëtuar me avionët e linjës për një vizitë private me bashkëshorten e tij, Linda Rama, si për të justifikuar mungesën e transparencës për të gjitha udhëtimet e tij me charter nëpër botë.
