Zëvendëspresidenti i Shteteve të Bashkuara, J.D. Vance, deklaroi se Rusia ka bërë “lëshime të rëndësishme” drejt një marrëveshjeje të mundshme për t’i dhënë fund luftës në Ukrainë, duke theksuar se ai është i bindur se po bëhet përparim, pavarësisht zhvillimeve në fushën e betejës.
Gjatë një interviste për emisionin “Meet the Press” në NBC, Vance tha se presidenti rus Vladimir Putin ka pranuar disa kushte të reja, përfshirë ofrimin e garancive të sigurisë për Ukrainën ndaj ndonjë agresioni të ardhshëm nga Rusia.
“Mendoj se rusët kanë bërë lëshime të mëdha ndaj Presidentit Trump, për herë të parë në tre vjet e gjysmë që nga fillimi i konfliktit,” u shpreh Vance. “Ata kanë deklaruar se nuk do të përpiqen të vendosin një regjim kukull në Kiev – që ishte një ndër kërkesat kryesore në fillim. Dhe më e rëndësishmja, ata kanë pranuar që të ketë një lloj garancie sigurie për integritetin territorial të Ukrainës.”
Zëvendëspresidenti amerikan shtoi gjithashtu se vendosja e sanksioneve të reja ndaj Rusisë do të shqyrtohet rast pas rasti, duke pranuar se masa të tilla nuk do të jenë efektive për ta detyruar Moskën të pranojë një armëpushim.
