Mandati i vetëm i koalicionit “Nisma Shqipëria Bëhet” në zgjedhjet e 11 majit i mbetet përfundimisht Ana Dajkos. Kolegji Zgjedhor vendosi sot të lërë në fuqi vendimin e KAS-it të 30 korrikut, duke i dhënë fund betejës së nisur prej javësh për këtë mandat.
Fillimisht, Adriatik Lapaj e kërkoi si fitues me vota preferenciale, ndërsa më pas mbështeti vendimin e kreut të KQZ-së Ilirjan Celibashi që mandati t’i jepej kushërirës së tij, Kleana Xhuveli, e katërta në listë. Celibashi njohu të drejtën e dorëheqjes së kandidatëve, mes tyre Xhuveli dhe Zeqir Kordhoni (daja i Endri Shabanit), por vendimi u rrëzua nga KAS, duke ia kaluar mandatin të parës në listë, Ana Dajkos. Sot Kolegji i dha fund përfundimisht këtij ngërçi, duke i hapur rrugë certifikimit të zgjedhjeve të 11 majit.
