Megyn Kelly ka reaguar ashpër ndaj aktores Blake Lively, duke e quajtur “një ngacmuese narciste”, pasi kjo e fundit e ka thirrur përmes një thirrjeje zyrtare gjyqësore në procesin që ajo ka hapur kundër Justin Baldoni.
Në emisionin e saj në SiriusXM, Kelly tha: “Blake Lively nuk mund të konceptonte që dikush si unë mund të kishte krijuar neveri të sinqertë ndaj saj, kështu që ajo supozoi se isha pjesë e një fushate shpifëse të orkestruar nga Baldoni.”
Sipas saj, Lively pretendon se gazetarë, komentatorë dhe krijues përmbajtjeje janë paguar ose ndikuar nga ekipi i Baldonit për të nxitur një fushatë kundër saj. Kelly reagoi duke thënë se kjo është “puro narcizëm”.
“Ky është niveli i egos së saj. Ajo mendon se unë kam nevojë të më paguajnë që të them gjëra negative për të,” u shpreh Kelly. “E vërteta është që e kam krijuar këtë opinion vetë. Askush nuk më ka paguar. E kam thjesht nga ajo vetë.”
Kelly njoftoi se ajo dhe ekipi i saj juridik e kanë refuzuar me sukses kërkesën e Lively dhe se nuk i kanë dorëzuar asnjë dokument, komunikim apo provë tjetër.
“Blake Lively nuk ka asnjë të drejtë të futet në mënyrën se si unë mbledh informacion ose përgatitem për emisionet e mia. Jam pjesë e shtypit të lirë dhe ajo është thjesht një person i dëshpëruar dhe i talentuar mesatarisht, që tenton të heshtë njerëzit që nuk i pëlqejnë,” deklaroi Kelly.
Ndërkohë, Lively ka ngritur padi kundër Baldonit për ngacmim seksual dhe hakmarrje, akuza që ai i ka mohuar kategorikisht. Ai, nga ana tjetër, ka kundërshtuar me një padi për shpifje dhe shantazh ndaj Lively dhe bashkëshortit të saj, Ryan Reynolds — por padia e tij u rrëzua.
Procesi pritet të zhvillohet në mars të vitit 2026, dhe të dy, Lively dhe Baldoni, pritet të dëshmojnë para gjykatës.
