Në orët e fundit Sergio Ramos ka bërë shumë bujë për publikimin e një kënge që titullohet “Cibeles”, e disponueshme në të gjitha platformat, që ka shumë referenca ndaj eksperiencës së tij me Real Madrid. Mbrojtësi spanjoll do të kishte ndërmarrë këtë nismë të re diskografike sepse do të ishte duke u përballur me probleme ekonomike.
Ish-kapiteni i Real Madrid ka befasuar fansat duke publikuar këngën e tij të parë si solist, e cila po ngjall shumë interes në rrjete sociale dhe vjen pas pjesëve të para (“La Roja baila” dhe “Otra estrella en tu corazon”) të publikuara vitet e shkuara dhe disa bashkëpunimeve të shpërndara, por Cristóbal Soria, ish-drejtues i Sevillas dhe tani gazetar, ka shpjeguar në programin e Antena 3 ‘Espejo Público’ arsyen e vërtetë të kësaj nisme: “Ka nevojë për para, është i falimentuar”.
Komenti mbi nismën diskografike: “Sergio Ramos i falimentuar”
"Ka nevojë për para, është i falimentuar, për të mbërritur në fund të muajit. Dhe po përpiqet gjithashtu të bëjë koncerte ose iniciativa të tjera të këtij lloji”, ka komentuar Cristobal Soria, duke iu referuar përfitimeve financiare që kjo këngë mund t’i sjellë atij, jo vetëm për vetë këngën, por edhe për mundësitë e punës që mund të lindin si rezultat, siç është pjesëmarrja në ngjarje të caktuara.
Bëhet fjalë për një zbulim shumë të fortë, mbi një nga futbollistët më të paguar në botë gjatë viteve të fundit: kontratat e tij me Real Madrid, periudha e kaluar te PSG dhe eksperienca e tij e fundit te Sevilla i kanë siguruar fitime shumëmilionëshe, të cilave u shtohen sponsorime, aktivitete tregtare dhe një imazh i njohur në nivel ndërkombëtar. A janë realisht vështirësitë ekonomike?
Soria e ka shtuar dozën: “Sergio Ramos ka regjistruar një album të tërë, kjo është vetëm një këngë, së shpejti do të vijnë këngë të tjera që ai ka regjistruar me yje të vërtetë të muzikës botërore. Atij i duhen të ardhura të reja sepse është i falimentuar dhe mezi arrin në fund të muajit. Po mendon gjithashtu edhe idenë e të bërit koncerte.” Ish-drejtuesi ka përmendur disa artistë që me gjasë kanë bashkëpunuar me Sergio Ramos për realizimin e albumit dhe ka bërë emrat e Carín León, J Balvin dhe Maluma.
