Sot në Gjykatën Themelore të Prishtinës do të mbahet seanca e parë gjyqësore në çështjen penale ndaj Faton Klinakut, i cili po përballet me akuzën për kanosje ndaj kryeministrit të Kosovës, Albin Kurti. Seanca është planifikuar të nisë në orën 09:00, dhe sipas procedurës ligjore, pritet që në sallë të jetë i pranishëm edhe vetë kryeministri Kurti, në cilësinë e të dëmtuarit.
Sipas aktakuzës së ngritur nga Prokuroria Themelore në Prishtinë, Klinaku dhe një person tjetër me inicialet N.S. akuzohen se më 30 gusht 2023 kanë kërcënuar kryeministrin përmes postimeve në rrjete sociale. Në aktakuzë thuhet se Klinaku ka ripostuar një mesazh me përmbajtje kërcënuese, ku ndër të tjera thuhej: “…Prapë po e përsëris, nëse ju duket skandaloz postimi i mëhershëm: Më parë e vras A.K. sesa t’ia lëshoj rrugën dhe të iki nga Kosova.”
Prokuroria ka bërë me dije disa javë më parë se ka dorëzuar aktakuzën në Gjykatën Themelore të Prishtinës ndaj të dy të pandehurve, të cilët ngarkohen me veprën penale “Kanosja”. Klinaku, i njohur si pjesëtar i Organizatës së Veteranëve të Luftës së UÇK-së, kishte reaguar duke thënë se nuk ishte informuar për ngritjen e aktakuzës, por se “mezi pret” të përballet në gjykatë me kryeministrin Kurti. Në seancën e sotme pritet që trupi gjykues të shqyrtojë vlefshmërinë e aktakuzës dhe të vendosë për vijimin ose jo të procedurës penale ndaj të akuzuarve.
