Nëna e Selena Gomez, Mandy Teefey, është vendosur në qendër të një skandali pas akuzave tronditëse për sjellje të papërshtatshme brenda kompanisë së shëndetit mendor Wondermind, të cilën ajo e themeloi bashkë me të bijën e saj të famshme.
Në një artikull investigativ të publikuar nga The Cut, ish-punonjës anonimë të Wondermind pretendojnë se 49-vjeçarja shpesh paraqitej e “dehur” në ambientet e zyrës, të cilën e quanin madje “shtëpi droge”.
Po ashtu, raportohet se në zyrat e Wondermind vinte rregullisht një “rotacion infermierësh” për t’i dhënë Teefey vitamina, që sipas saj ishin të nevojshme për të përballuar pasojat e COVID-it të rëndë dhe pneumonisë së dyfishtë që kaloi në vitin 2021. Punonjësit thonë se pas injeksioneve ajo shpesh fliste ngadalë dhe dukej e përgjumur.
Burime të tjera pretendojnë se edhe vetë Selena Gomez ishte e vetëdijshme për problemet e nënës së saj.
“Jam i bindur 100% se Selena e dinte që nëna e saj nuk ishte në gjendje të menaxhonte një kompani të tillë,” – tha një ish-punonjës për The Cut.
Megjithatë, Mandy Teefey ka hedhur poshtë me forcë akuzat:
“E kam nisur Wondermind për të ndihmuar njerëzit me probleme të shëndetit mendor. Është fatkeqësi që disa ish-punonjës të pakënaqur shpërndajnë gënjeshtra për mua, dhe edhe më zhgënjyese që mediat i amplifikojnë ato,” – tha ajo për Us Weekly.
Kompania Wondermind, e themeluar në vitin 2022 nga Teefey, Gomez dhe sipërmarrësja Daniella Pierson, kishte si qëllim të krijonte një platformë mbështetjeje për shëndetin mendor. Por në maj 2025, sipas Forbes, startup-i u detyrua të largonte 60% të stafit për shkak të problemeve financiare.
