Lady Gaga anuloi së fundmi koncertin e radhës të Mayhem Ball Tour, Miami vetëm disa minuta para nisjes.
Në një mesazh të postuar në Instagram Stories, këngëtarja 39-vjeçare kërkoi ndjesë duke shpjeguar se gjatë provave ndjeu tension të madh në zë.
“Jam shumë, shumë e trishtuar, por duhet të shtyjmë shfaqjen e sonte. Mjeku dhe trajneri im i zërit më këshilluan të mos ngjitem në skenë për shkak të rrezikut që mbart për kordat e mia vokale,” – shkroi ajo.
Gaga shtoi se kishte menduar të performonte pavarësisht dhimbjes, por frika për një dëmtim afatgjatë ose të përhershëm e detyroi të ndalonte.
“Është vendimi më i vështirë, por nuk mund të rrezikoj zërin tim. Ju dua shumë dhe po përpiqem të caktoj sa më shpejt një datë tjetër,” – tha ajo duke u kërkuar fansave mirëkuptim.
Ky nuk është incidenti i parë gjatë turneut të saj. Në korrik, Lady Gaga rrëshqiti në skenë gjatë një shfaqjeje në Las Vegas, por u rikuperua menjëherë dhe vazhdoi performancën sikur të mos kishte ndodhur asgjë. Ndërsa në maj, koncerti i saj në Rio de Janeiro u bë objektiv i një plani për sulm me bombë nga një grup ekstremist, i cili fatmirësisht u zbulua nga autoritetet përpara se të ndodhte diçka.
Këngëtarja e hitit Poker Face pritet të kthehet në skenë më 6 shtator me një koncert madhështor në Madison Square Garden, New York.
