Aktori i njohur James McAvoy është goditur nga një person i dehur në një bar gjatë Festivalit të Filmit në Toronto.
Aktori i “X-Men: First Class” po festonte premierën e filmit të tij debutues si regjisor, California Schemin’, mbrëmjen e 8 shtatorit, kur një klient i dehur e sulmoi duke i dhënë një grusht.
Sipas dëshmitarëve, incidenti ndodhi rreth orës 23:55 në barin Charlotte’s Room. Stafi i lokalit kishte tentuar ta nxirrte personin jashtë, por ky, i irrituar, u kthye dhe e goditi aktorin skocez.
Fatmirësisht, McAvoy nuk u lëndua dhe madje arriti të qeshte me situatën pas ndërhyrjes së të pranishmëve që e nxorën agresorin jashtë. Ai qëndroi në bar dhe vazhdoi mbrëmjen me producentët e filmit të tij.
California Schemin’ u shfaq premierë në TIFF më 6 shtator dhe rrëfen historinë e vërtetë të dy reperëve skocezë, të cilët u shtirën si amerikanë për të ndjekur ëndrrën e tyre muzikore. McAvoy ka marrë jo vetëm drejtimin e filmit, por edhe një rol të vogël në të.
Aktori e përshkroi eksperiencën e tij të parë si regjisor si “stresuese, por e mrekullueshme”, duke theksuar se ishte “puna më kreative” që ka bërë në karrierën e tij./Lapsi.al
