Të flasësh për Diego Armando Maradonën futbollist është e tepërt, meqë edhe në vitin 2025 – shumë vite pas ndeshjes së tij të fundit të luajtur, një Boca-River i vitit 1997, dhe pesë vite pas vdekjes së tij – kushdo e di se kush ka qenë ‘Pibe de Oro’. Interpretues i konceptit më të pastër të ‘dionisiakut’, i aplikuar në çdo moment të jetës së tij brenda dhe jashtë fushës, Maradonës nuk i ka munguar kurrgjë: me shumë gjasë pothuaj askush nuk e di, të paktën në Shqipëri, që Diez ka qenë edhe boksier, duke u ngjitur në ring për një ndeshje me një boksier profesionist shumë të famshëm në atdhe, Santos ‘Falucho’ Lacier.
Ishte prilli i vitit 1996, Maradona ishte atëherë 35 vjeç dhe kishte rikthyer të luante në Argjentinë për ta mbyllur karrierën me fanellën e të dashurit Boca Juniors. Ishte atëherë që Diegos i erdhi në mend të merrej seriozisht me boks me mikun e tij të madh dhe legjendarin boksier Santos ‘Falucho’ Lacier, një vit më i madh se ai. Lacier kishte qenë kampion bote në dy kategori peshe, duke mbajtur titullin e peshave të mushtit WBA (dy herë midis viteve 1981 dhe 1985) dhe titullin e peshave super musht të WBC në vitin 1987.
Ndeshja e boksit mes Maradonës dhe ish-kampionit të botës Lacier
Maradona i kishte premtuar Lacier se herët a vonë do të ngjitej në ring me të dhe në fund ndeshja u zhvillua (e organizuar si një demonstrim me tre raunde), pikërisht 15 vite pas fitores së paharrueshme të boksierit argjentinas në Afrikën e Jugut kundër kampionit të atëhershëm të botës në musht Peter Mathebula, i rrëzuar nga ‘Falucho’. Të ardhurat e ndeshjes iu dhuruan General Paz Junior’s Club, një shoqëri polisportive argjentinase me qendër në qytetin e Kordobas, selia e takimit.
Diego Maradona gjatë ndeshjes me Santos ‘Falucho’ Lacier
Në atë rast Dieguito veshi një helmetë mbrojtëse, doreza të zeza dhe pantallona të shkurtra të verdha e blu (ngjyrat e Boca-s). Sigurisht klima e aktivitetit ishte ajo e një feste (që në momentin e peshimit Maradona kishte regjistruar 75 kg kundrejt 61 kg të Lacier-it…), por të dy nuk ia kursyen njëri-tjetrit disa shkëmbime ‘të forta’. Në mes të ndeshjes për më tepër boksierët pushuan së godituri njëri-tjetrin dhe nisën të godisnin me shaka arbitrin, mes të qeshurave të publikut.
Ndeshja mes Maradonës dhe Lacier përfundoi me barazim, por argëtimi nuk mbaroi me gongun e fundit, pasi Pibe vazhdoi të jepte spektakël duke u shfaqur me një seri pallegjesh me topin e dashur.
