Aktorja Amanda Seyfried po përballet me valë reagimesh të ashpra pas deklaratave të saj në rrjetet sociale lidhur me vrasjen e konservatorit dhe aktivistit politik Charlie Kirk.
Në një postim në Instagram të dielën, Seyfried u shpreh se Kirk “ishte i mbushur me urretje”, duke iu përgjigjur një postimi që nxirrte në pah deklaratat e tij kontroverse për abortin, emigracionin, komunitetin e njerëzve me ngjyrë dhe tema të tjera.
Në Instagram Stories, ajo shpërndau një mesazh me përmbajtjen: “Nuk mund të ftosh dhunën në tryezën e darkës dhe të habitesh kur ajo fillon të hajë.” Ky postim u interpretuar si sugjerim që Kirk kishte nxitur vetë vrasjen e tij, gjë që shkaktoi reagime të forta dhe kritika ndaj aktorës.
Shumë përdorues të platformës X (ish-Twitter) reaguan ashpër, duke akuzuar Seyfried se po justifikonte vrasjen e Kirk dhe duke bërë thirrje për bojkot të filmave ku ajo luan. Disa e akuzuan për hipokrizi, duke krahasuar qëndrimet e saj me ngjarje të tjera të dhunshme, si protestat pas vdekjes së George Floyd.
Në Instagram, komentet negative nuk munguan, ku shumë i kërkonin të “bëhej një person më i mirë” dhe e akuzonin se nuk kishte njohuri të mjaftueshme për Charlie Kirk për të bërë ato akuza.
