Jessie J ka njoftuar zyrtarisht publikimin e albumit të saj të gjashtë në studio, të titulluar Don't Tease Me with a Good Time, i cili do të dalë më 28 nëntor 2025.
Në një postim në Instagram Stories, artistja 37-vjeçare zbuloi disa nga titujt e këngëve që do të përfshihen në album, përfshirë: “No Secret”, “Believe in Magic”, “And the Award Goes To” dhe “Living My Best Life”.
“Ka plot gjëra që po ndodhin,” shkroi Jessie, duke shtuar se mezi pret që fansat të dëgjojnë projektin e saj më të fundit.
Ky rikthim emocionues vjen pas një periudhe të vështirë për artisten, e cila në qershor zbuloi se ishte diagnostikuar me kancer të gjirit. Për shkak të nevojës për një operacion të dytë, Jessie u detyrua të shtyjë koncertet në Mbretërinë e Bashkuar dhe Evropë, ndërsa anulloi turneun në SHBA.
“Nuk është asgjë shumë serioze, por operacioni duhet bërë deri në fund të vitit,” tha ajo në një deklaratë më 28 gusht. “Më vjen keq, ndjehem e frustruar dhe e trishtuar, por më duhet të shërohem.”
Koncertet në Evropë dhe Britani janë zhvendosur për prillin e vitit 2026, ndërsa biletat për SHBA do të rimbursohen automatikisht.
Më 6 shtator, Jessie J performoi në festivalin BBC Radio 2 In the Park në Angli, duke u ngjitur në skenë për herë të parë pas operacionit.
Ky moment kishte një rëndësi të veçantë për djalin e saj 2-vjeçar, Sky Safir, i cili për herë të parë e pa nënën e tij duke performuar live.
“Jam akoma në proces shërimi, por dua të jetoj në moment dhe ta shijoj jetën. Nuk e di si do të shkojë çdo performancë, por jam kaq mirënjohëse që jam këtu,” – tha Jessie para turmës.
