Bad Bunny po përballet me një padi prej të paktën 1 milion dollarësh, të ngritur nga një banor 84-vjeçar nga Puerto Rico, i cili pretendon se shtëpia e tij u përdor pa autorizim të plotë në një film të shkurtër të artistit dhe gjatë rezidencës së tij verore në San Juan.
Román Carrasco Delgado, një burrë i moshuar dhe i ve nga qyteti bregdetar i Humacao, ka paditur artistin më 17 shtator, duke pretenduar se shtëpia e tij u shfaq në filmin e shkurtër të Bad Bunny-t me titull "Debí Tirar Más Fotos", i publikuar në janar.
Shtëpia më pas u përdor si frymëzim për një skenë të ndërtuar në përmasa reale, e njohur si "La Casita", gjatë rezidencës 31-ditore të këngëtarit në Coliseo de Puerto Rico José Miguel Agrelot në San Juan. Kjo strukturë është kthyer në simbol të koncertit, ku kanë qenë të ftuar edhe shumë figura të njohura për të ndjekur shfaqjen nga afër.
Carrasco deklaron se shtëpia e tij është shndërruar në një atraksion turistik të padëshiruar, ku vizitorë të shumtë vijnë çdo ditë për të bërë fotografi dhe video, duke shkelur privatësinë e tij. Ai shprehet se nuk ka përfituar asgjë nga përdorimi i imazhit të shtëpisë së tij, ndërkohë që ajo është shfaqur në dhjetëra apo qindra postime në rrjete sociale dhe përdorur për qëllime tregtare.
Carrasco pranon se kishte dhënë leje për të xhiruar videon, por pretendon se nuk ishte në dijeni të përdorimit të mëvonshëm të shtëpisë si skenë koncerti. Ai gjithashtu thotë se nuk di të lexojë apo shkruajë, përveç nënshkrimit të emrit të tij, dhe se personat që kërkuan lejen e tij kishin falsifikuar apo keqpërdorur nënshkrimin e tij në dy kontrata të ndryshme.
Sipas dokumenteve ligjore, këto kontrata nuk iu dorëzuan apo shpjeguan ndonjëherë, ndaj kërkohet që ato të shpallen të pavlefshme.
Për përdorimin e shtëpisë në videoklip, Carrasco thotë se mori vetëm dy çeqe me vlerë totale prej 5,200 dollarësh. Ndërkohë, videoja ka mbledhur mbi 22 milionë shikime dhe rezidenca e Bad Bunny-t ka gjeneruar mbi 200 milionë dollarë për ekonominë lokale, sipas CNN.
