Një video e postuar muaj më parë nga Joshua Mhlakela, një predikues nga Afrika e Jugut, pati miliona shikime dhe ka shkaktuar diskutime të shumta online. Në klip, Mhlakela pretendon se ka marrë një vizion hyjnor.
Ai thotë se ka parë Jezusin të ulur në një fron që njofton kthimin e tij për të "marrë Kishën e tij" më 23 dhe 24 shtator 2025. Ky parashikim është bërë një fenomen viral, veçanërisht në TikTok, ku hashtagu #Rapture (Rrëmbimi) ka përfshirë mijëra video.
Disa e marrin seriozisht njoftimin ndërsa të tjerë tallen me të si “një tjetër fund të botës të destinuar të mos ndodhë kurrë”.
Çfarë është "Rrëmbimi"?
"Rrëmbimi" është një doktrinë e mbështetur nga disa ungjillorë, sipas së cilës besimtarët e vërtetë do të merren në qiell nga Jezusi para fillimit të një periudhe shtrëngimi dhe fundit të botës. Edhe pse termi nuk shfaqet në Bibël, përkrahësit citojnë fragmente nga Bibla, siç janë 1 Thesalonikasve, 1 Korintasve dhe Ungjilli i Mateut.
Ky vizion, i lindur në Britani në mesin e shekullit të 19-të, është përhapur përmes konferencave fetare, mediave ungjillore dhe veprave të trillimit, siç është seria "Left Behind" dhe filmave apokaliptikë.
Profecitë që kthehen në mënyrë ciklike
Mhlakela nuk është i pari që cakton një datë për “Rrëmbimin”. Në vitin 2011, kaliforniani Harold Camping njoftoi se kjo do të ndodhte më 21 maj, duke investuar shumë në fushata reklamuese. Parashikimi rezultoi i pasaktë, duke e detyruar atë të tërhiqej.
Edhe më herët, në shekullin e 19-të, William Miller parashikoi kthimin e Krishtit midis viteve 1843 dhe 1844. Dështimi i datave të tij çoi në të ashtuquajturin "Zhgënjim i Madh" të 22 tetorit 1844, i cili i dha jetë lëvizjeve të reja fetare, siç është Kisha Adventiste e Ditës së Shtatë.
Konteksti aktual dhe krizat globale
Sipas disa studiuesve, narrativat apokaliptike lulëzojnë në kohë paqëndrueshmërie globale. Luftërat, konfliktet dhe krizat ndërkombëtare nxisin idenë se fundi është afër, duke nxitur përhapjen e profecive si ajo e Mhlakela-s. Nuk është rastësi që parashikimi i tij u shfaq teksa vëmendja globale është e përqendruar në tensionet në Lindjen e Mesme dhe Ukrainë.
#RaptureDay, Apokalipsi dhe mediat sociale
Megafoni i vërtetë i profecisë ka qenë TikTok. Në platformë, videot rreth "Rapture Day" kanë gjeneruar miliona shikime, duke shkaktuar një debat që luhatet midis besimit, satirës dhe kuriozitetit. Shumë veta kanë vënë në dukje rastësinë me fillimin e festës hebraike të Rosh Hashanah, e cila bie më 22 shtator.
Historia tregon se parashikime të tilla pothuajse gjithmonë rezultojnë të pasuksesshme. Megjithatë, çdo date e re tërheq vëmendje dhe diskutime. Studiuesit vërejnë se predikuesit, të përballur me dështimin kanë tendencë të justifikojnë veten duke folur për "luftë shpirtërore" ose mungesë bashkëpunimi nga ana e njerëzimit.
Pavarësisht kësaj, “Rrëmbimi” vazhdon të ushtrojë një magjepsje dhe të nxisë imagjinatën kolektive, veçanërisht në kohë të shënuara nga frika dhe pasiguria. ©LAPSI.al
