Këtë të hënë Edi Rama ia delegoi zv.kryeministres së tij, Belinda Ballukut përgjigjet ndaj opozitës në sallën e parlamentit por askush nuk e priste që replika të merrte trajtat e një shkëmbimi batutash me natyrë flirtuese. Kur ka parë përballë saj deputetin e opozitës Klevis Balliu, Balluku e ka thirrur me një epitet që ngjalli buzëqeshje në sallë: “Bukurosh”.
Pas reagimeve të tij të vazhdueshme, Balluku ka vazhduar duke e shndërruar debatin në një skenë që ngjante më shumë me ato që shohim në lokale se sa në seanca parlamentare.
“Ky është problem, sepse ky çfarë nuk thoshte më përpara, imagjino tani që filloi të besojë se është bukurosh! Kjo është më e keqja”, tha ajo, duke ia zgjatur sallës të qeshurat.
Për ta zbutur situatën dhe për të fashitur hamendësimet e rastit, Balluku la të kuptohet se kishte njohje familjare me Balliun: “Mund të pyesësh edhe Fariun, edhe Letën, që andej nga fisi ynë nuk ka nevojë për ndërhyrje.”
Kjo është ndër herët e rralla që zv.kryeministrja zgjedh t'i përgjigjet opozitës në parlament dhe deputetët e PD duhet të përgatiten që mund të gjenden përballë një strategjie të re, që përfshin edhe buzëqeshjet, edhe komplimetat nga ana e grave dhe vajzave të mazhorancës, të cilat mund të tentojnë t'i zbusin deputetët kundërshtarë duke u thënë “bukuroshë”.
