Nga data 1 tetor pensionistët do të kenë pak më shumë para në xhepat e tyre. Për ata që janë me pension minimal bëhet fjalë për gati 3 mijë lekë ose 4 mijë lekë të vjetra, shumë që është rritur pas indeksimit që ka vendosur të bëjë qeveria për thuajse 721 mijë pensionistë.
Një pensionist me një pension mesatar 11.878 lekësh pas një indeksimi 2.5% do të përfitojë shtesë vetëm 3 mijë lekë të vjetra.
Por këtë rritje minimale të pensionit, Arlind Qori i Lëvizjes Bashkë e ka quajtur një tallje që bën kryeministri Edi Rama me të moshuarit. Ai ka kujtuar premtimin për pensione minimale 400 euro që Rama bëri në fushatë, ndërsa i ka ftuar pensionistët të protestojnë.
“Qeveria ka vendosur t'i rrisë pensionet me 2.5%: dy shishe qumësht në muaj dhe një tallje e madhe me mbi 700,000 pensionistë. Gjatë fushatës Edi Rama premtoi se në krye të katër viteve pensioni mesatar do të bëhej 400 euro, çka nënkupton se rritja e përvitshme duhet të ishte mbi 50 euro. Të nderuar pensionistë! Edhe sa do të duroni?!” shkruan Qori në rrjetet sociale ku i fton pensionistët të dalin në protestë.
